الف الوف العرب مثلي تصيح ..... كم واحد من الهوى قلبه جريح

بسم الله الرحمن الرحيم
القائل"لبشير شنان

الف الوف العرب مثلي تصيح ..... كم واحد من الهوى قلبه جريح
اليوم ماتشوف واحد مستريح ..... كلا بقلبه هواجيس وهموم


البا بروني بنات آخر زمان ..... شفت البهاذيل منهم والهوان
وروني الهجر من عقب الحنان ..... حسبي عليهم مافيهم رحوم

التا ترى اللي تولع بالبنات ..... يصيبه جنان من عقب الثبات
يقضي نهاره بونه وازفرات ..... دايم هذي شغلته جلسن ويقوم

الثا ثلاث اذهبوا حالي ذهاب ..... في الصالحيه سقاها السحاب
حصلتهم واقفينن عند باب ..... وقامت بي الارض والدنيا تدور

الجيم جيت اتمشى بالعدال ..... قلت ارحموني يعيال الحلال
عطشان محتاج للماي الزلال ..... والخير معكم ماهو بمعدوم

الحا حكو بينهم وانا استمع ..... قالوا مشينا ولا احدن يمتنع
اليوم واياه نبغي نجتمع ..... ونشوف رايه اذا معنا ينوم

الخا خذوني ودخلنا وسط بيت ..... قالوا محلك واطلب مااشتهيت
كانك تبي الليله معانا تبيت ..... اهلا وسهلا مكانك كل يوم

الدال دار الفرح والانسدار ..... واقول يالله تبطي بالنهار
ليله سعيده صارا بها اللي صار ..... ياليت ربي يخليها تدوم

الذال ذبحي يوم قرب الفجر ..... قمت آتقلب على مثل الجمر
اخاف يقولون قم وش تنتظر ..... وصير من شوف الاحباب امحروم

الرا رحى البين قامت بي تدور ..... مدري وش يصير من عقب الفطور
خايف فطور ومن عقبه ظهور ..... وان قالوا اظهر عدوني امعدوم

الزا زهموني وتناولت اللحاف ..... وغديت مثل الذي صابه خفاف
قالوا قم افطر وعود لاتخاف ..... الضيف له عندنا عشرين يوم

السين ساعت خرجت امن المنام ..... حصلت كلش جاهز بالتمام
افطرت وقالوا اذا تبغى تنام ..... ادخل الحجره عن حر السموم

الشين شفت اللقاء ماهو بيطول ..... قمت آتكلم وانا من اول خجول
قلت يابنات اسمعوني وش بقول ..... بقول كلمه ولا احد لي يلوم

الصاد صفوا وقالوا وش تريد ..... امر وفي الامر خدام وعبيد
قلت انا صابر وصبري مايفيد ..... وش حالتي لاانتهت عشرين يوم

الضاد ضحكوا وقالوا ماعليك ..... ان جيت ولا ندوم احنا نجيك
مادام تبغانا فحنا نبيك ..... لو ضاعت الخوه لمروه تدوم

الطا طلبت منهم لفت النظر ..... قلت لو سمحتوا تخلوها شهر
زيدوها عشر ايام اظن ماتضر ..... قالوا مانقدر لو تبي ربع يوم

الظا ظحكت وضميري يلتهب ..... ابغى اتجمل لايبين الغضب
ناري تسعر وزادوها حطب ..... الله يلوم الذي لمثلي يلوم

العين عيت عيوني لا تنام ..... عقب ما ايست من نيل المرام
اقضي الليل في شوق وهيام ..... مالي جدا غير تحسيب النجوم

الغين غلق سروري وقضى ..... يوم احدعش يوم من المده مضى
قمت اتقلب على جمر الغضى ..... عزي لمثلي تولته الهموم

الفا فؤادي خطير بينقطع ..... لاشفت نور الفجر عندي طلع
حتى من الاكل والشرب امتنع ..... ماغير افكر في العشرين يوم

القا قريت في حال خطير ..... اقوم واقعد مشغول الضمير
ياناس وين الذي يسعى بخير ..... ويساعد اللي زمانه له ظلوم

الكاف كيف العمل يا مسلمين ..... معقول اقعد كذا قلبي حزين
مافي احد منكم قلبه يلين ..... خوفوا من الله في حال امعدوم

اللام لو ان بي وربي العظيم ..... اني في ذا البيت ملزوما مقيم
لااروح للنار واخلي النعيم ..... الخير انا منه ماني بمحروم

الميم مالي من احبابي طلوع ..... لاني بمحتاج ولالي طموع
واخاف اطلع ولا احصل رجوع ..... وان قالوا اطلع عدوني امعدوم

النون نومي هواجيس وحزن ..... كني غريب حذف وسط السجن
لولاي اخشى يقولون استجن ..... لا اقوم واصيح فالاسرى ظلوم

الها هلاكي يوم قرب الوعد ..... قالوا خلاص انتبه يابوفهد
اطلع مادام الطريق مافيه احد ..... قلت اسمحولي انا ماقدر اقوم

اليا يوم ايست وما عاد لي جلوس ..... فتحت جيبي وطلعت الفلوس
قالوا يا مسكين اذا تسبح نغوص ..... لا شك رحله تشل عنك الهموم